In 2003 het ek my eerste profetiese woord ontvang by 'n kamp met die tema "Doen", aangebied deur Amilia Meiring (Botha). Daardie dag het iets diep binne my begin leef – al het ek toe nog nie verstaan hoe lank en moeilik die pad sou wees nie. God het 'n droom in my hart geplant, 'n droom wat vir meer as twintig jaar sou bly staan.
Daar was baie afdraai paaie, seer en baie twyfel. Tog het elke moeilike seisoen my voorberei vir die roeping wat God oor my lewe uitgespreek het.
2021
Daardie jaar het Betsie Joubert dieselfde woord wat ek jare tevore ontvang het, weer bevestig. Dit het gevoel asof God weer sê: "Ek het nie vergeet van die droom wat Ek in jou geplant het nie."
In Augustus 2022 ontvang ek nóg 'n woord – hierdie keer deur Andries van Heerden. Hy vra my in: "Alive at 5" woord: "Wanneer gaan jy nou begin kampe doen?" Maar nog voordat hy klaar praat, hoor ek die Here se stem soos 'n leeu wat brul. In daardie oomblik het ek geweet: dit is God wat praat. Ek kon nie langer wegstap van Sy roeping vir my nie. My liefde vir Hom was te groot om ongehoorsaam te bly.
God het toe vir ons 'n Skrif gegee:
"1 Johannes 2:27 – Sy Gees leer julle alles, en wat Hy julle leer, is die waarheid en geen leuen nie."
En net daar is Back2Basics gebore – nie uit groot planne of baie geld nie, maar uit eenvoudige gehoorsaamheid. Net 'n jagkamp. Net twee mense wat bereid was om "ja" te sê. Want God stuur dikwels twee-twee uit.
Kort daarna gaan ek op 'n 40-dae vas, in een van die moeilikste storms van my lewe. Met twee kinders in rehabilitasie en 'n baba by die huis, het ek dikwels gevoel ek kan nie meer aangaan nie. Maar selfs in daardie seisoen het God getrou gebly.
Ons eerste kamp was op 30 September 2022 – net ses weke nadat ek die woord ontvang het. Daar was net sewe dames. Ons was bang, onseker en opgewonde alles op dieselfde tyd. Daar was baie teenkanting en selfs mense wat probeer het om die droom te steel, maar God het ons telkens herinner aan Lukas 16:10: "Wees getrou in die klein dinge."
Deur elke kamp het God vir ons gewys dat Hy nie groot begin nodig het nie. Hy sê net: "Gebruik wat julle het." En dis presies wat ons gedoen het.
En elke keer wanneer ons gevoel het ons kan nie meer nie, het Hy die regte mense gestuur om saam met ons te bou, te dra en aan te hou glo.
Wat begin het as 'n wilde en eenvoudige jagkamp, het verander in 'n plek waar mense die tasbare teenwoordigheid van God ervaar. Tot vandag toe bly Back2Basics 'n stap van geloof, gehoorsaamheid en volle vertroue in God.
The joy is in the journey.